الرئيسية / المقالات والتحليلات / المقاومه (2) :ممكن نعمل شنو؟ نساهم كيف؟

المقاومه (2) :ممكن نعمل شنو؟ نساهم كيف؟

المقاومه (2) مفاهمات و حوار:

ممكن نعمل شنو؟ نساهم كيف؟ 
(كل ما يرد تحت هو آرائي الخاصة لا تمثل أي مجموعة أو جهة منعاً لأية إلتباسات) عصام


نقطة مهمة يجب الوضوح حولها الآن: قناعتي الخاصة طيلة سنوات تواجدي خارج السودان و اعمل بها بالتزام أنني لا أتدخل على الاطلاق في الاشياء التنفيذية لما يحدث داخل السودان في ما يخص الشأن العام و المقاومة (أعني عمل كل الاجسام الفاعلة فيه و ليس تنظيم بعينه)، كيف ينظمون أنفسهم و لماذا، أي فعل يقررونه بخصوص أي حدث، هل يتظاهرون أم لا ؟ ينفذون إضراب أم لا؟ و هكذا، هذا شأنهم هم أدرى بقدراتهم و ظروفهم و لهم حساباتهم و تقديراتهم، من باب الاحترام لحقهم في التفكير و إتخاذ القرار حتى الخاطئ منه فهم من سيتحملون تبعاته المباشرة و إعتقد أن من بالخارج سيكونون دعم و سند حقيقي إن توقفوا عن إصدار التوجيهات و الامنيات مثل تظاهرو اضربو اعتصمو الخ. للجميع الحق في ابداء الرأي اياً كان حول الجوانب السياسية و النظرية و الفكرية حول الحدث المحدد و حول القرارات العملية نفسها واضعين في البال حق من يتصدى لهذا الشأن في اتخاذ القرار و الحق في الخطأ مثلما نفعل جميعا. كلامي ده ليس المقصود منه عدم انتقاد الاخطاء أو التوقف عن النصح و ابداء الرأي .. بس نكون واقعيين شويه و فاهمين انو ظروف الزول او الناس الفي نص المعمعه مختلفه بالكامل و خاصه لما يكون شغل واسع اصدار قرار ما بتتحكم فيهو اشياء كتيره و حسابات و توازنات معقده. ده غير انو يا دوب الناس بتفتفك في عضلاتا الخامله زمن طويل و بتسخن للجاي و بترتب في روحا و تكنشف قدراتا (انو نحن كتار) .. الاعتقالات و المراقبه بتعيق الحركه و تشل لي فتره .. و فوق ده كله ظروف المعيشه القاسيه (الناس دي كلها عندها مسئوليات).

ممكن نعمل شنو؟ نساهم كيف؟ 
دي ما مقترحات إنما محفزات تفكير و بس .. نبدا بالخفيف و الممكن .. الكلام ده كلو موجه حصريا للناس الفعلا مع التغيير و الحراك .. في ناس تانيه مشغوله بي ما سخرت له و ديل ما موضوعنا هنا:

– نجيب الحجار .. لو ظروفنا ما بتسمح نفلق
– ما ندس المحافير
– ما نكسر المقاديف
حارب الاشاعات و الاخبار الكاذبه ايآ كلن مصدرا
– قبل ما ترسل في الواتساب و لا الفيسبوك و لا غيرو اقرا مرتين و دقق و فكر: هل هو حقيقي؟ هل هو مفيد و داعم للحراك؟ سبق صحفي غير مونتي كاروو مافي 😂 .. احسن خبر بايت و حقيقي و مفيد من عاجل و مضروب و ضار
– النقد مهم و ضروري و مطلوب جدا .. الطاقه السلبيه و الجو المسموم و مخنوق هدامات .. في ناس بحسن نيه و ربما ده طبعهم يتنفسو طاقه سالبه .. لو خففوها شويه يكون خير

التنظيم و التنسيق ، ما لازم يكون حاجه معقده او كبيره او خطيره، مجهود نفرين مؤثر اكتر من مجهود زول واحد .. اتفقو علي البتقدرو عليهو و ابتدو فيهو .. مع التنفيذ بيبدا يتحسن .. 
– في الحي .. في الشغل .. فريق الكوره .. جالية المنطقه .. ناقش الحولك يدعمو الحراك بما تيسر
– الرسامين: بوسترات و شعارات دعم .. الهواه و شبه المحترفين ما قصرو
– الدبلوماسيين السابقين .. ممكن تعملو شنو؟
– المحامين و القانونيين البره؟
– الفنانين و المغنيين .. الصحفيين البره؟ 
– الكتار الشغالين في منظمات الامم المتحده و منظمات تانيه؟
– و غيرهم … 
– الدعم المالي مشكله كبيره، اي مبلغ بيساعد، وصلو لي زول بتثق في انو يوصل محل حوجه، لو ما لاقي زول لمو عندك لغاية تلقي. ما لازم مبلغ كبير .. للبره: عشره دولار/ريال/اويرو الخ بالجمبه كل اسبوع بتعمل حسبه اخر الشهر.
– رسل كاميرات تصوير، ادويه و ما شابه
– في منطقتك او اسرتك او حتة شغلك .. بشكل ما يضرك اضغط علي عناصر النظام و الامن .. حصار بالاسئله عن الحاصل
– في منطقتك او اسرتك او حتة شغلك .. ارصد عناصر النظام و الامن … ما تستهين بالحيلهم ميت و لابدين .. بعضهم مواقعهم عاليه شديد او بيشاركو في القمع و التعذي.. اكتب في ورقه و لمها حيجي يوم الاستفاده منها ..
– بره برضو : عناصر النظام و الامن في السفارات و الجاليات و الواجهات التجاريه و المنظمات .. اكتب و لم و لو صورت يكون كويس
– لي ناس بره: لو بلدك بيسمح شوف كيف ممكن تنشر في الاعلام عما يحدث في السودان، هل ممكن توصل ما يحدث لبرلمانيين؟ (ده حاصل في كندا و بريطانيا و فرنسا كامثله) .. ما تستهين بي علاقاتك هناك مهما كانت بسيطه… لو انت ما بتقدر او ما بتعرف دفر الناس البعرفو و بقدرو .. لو ما متحركين

المعتقلين و المعتقلات: 
– رصد الاسماء و الحالات في اي مكان و بكل التفاصيل المتاحه
– رصد حالات التعذيب و المرض .. 
– نشر الاسمتء و توصيلها لمنظمات حقوق الانسان الدوليه و الاقليميه و في الدول 
– اسر المعتقلين: ما كل الاسر عندها تجربة تعامل مع اعتقال احد افرادها، محتاجين مسانده و دعم معنوي، زيارتهم مفيده و توريهم انهم ما براهم .. اربطهم بي اسر تانيه او لجان اسر المعتقلين. 
– بعض الاسر سندهم (مادي و معنوي) الرئيسي معتقل .. ادعم بي البتقدر عليهو .. كيس حلاوه للشفع .. او تسوقهم تفسحهم .. اي شي مفيد .. لو ما يتقدر شوف البيقدرو
– رسل ادويه .. كثير من المعتقلين بيعانو من امراض .. الادويه مشكله في السودان ..

… 
ارح … نتفاهم .. بي واقعيه 
منو القال: كن واقعيا و حاول المستحيل!

اضف رد

لن يتم نشر البريد الإلكتروني . الحقول المطلوبة مشار لها بـ *

*

Social Media Auto Publish Powered By : XYZScripts.com
UA-74845721-1